【走鬼】
深夜嘅新填地街，同日頭係兩個世界，靜得嚇人。大部分司機都去新興排隊，去砵蘭街碌，只有一兩部的士喺度慢溜。
就係一人上車。兩座高樓大廈之間留下嘅空位，光線絕難照入去嘅後巷，忽然有一人一鼠衝出嚟，跌跌撞撞半彎腰咁跑，起初都唔似係人。
「海輝道公園！快。」
揸得再快，都要停紅綠燈。心急嘅乘客亦不得不冷靜落嚟。令人驚恐嘅係，後座傳來拉低褲鏈嘅聲音。幾乎係下意識咁望向倒後鏡，男乘客同我四目交投，意味住乘客已經透唔倒後鏡望住我。
「差人掃場呀，走鬼走到鳩都縮埋，褲鍊都拉唔切。」Ok，唔洗話我知你條鳩嘅狀態。
「掃場又會俾你走到？」
「次次都打鑼打鼓咁上嚟，點會走唔到。抄牌啲警車都會響住嚟，食環捉小販永遠都收到風㗎啦。」
講到咁我即明：「有時都會㩒住抄，你走出嚟都狼狽啦。」
「㩒住抄，通常我哋收到投訴先會咁做嘅。頭先係因為我啱啱出緊，走慢咗。正常都無事嘅，有無睇過《哥斯拉大戰金剛》？兩個堂口嘅大佬角力，先會㩒住拉人，平時？咪又係懶懶閒。」
嗯，信息量有啲大，我唔再出聲，安安靜靜咁揸車去目的地。
「司機，再快少少，我保安打嚟話有人泊咗我個車位。去啦，櫻桃街隧道仔無快相。」
聽從指示，地板油去到海輝道公園一部寶馬M4隔離，放低一百蚊就走，果然真係好趕時間。我未掉頭，M4已經絕塵而去，趕返去搵泊咗佢車位嘅人。
Search